न्युरो कार्डियो एण्ड मल्टिस्पेशियालिटी अस्पताल विराटनगरले कोशी र मधेश प्रदेशका विभिन्न स्थानमा निशुल्क स्वास्थ शिविरहरू तथा सचेतना कार्यक्रम आयाेजना गर्ने भएकाे छ। विराटनगर बाहेक अन्य तीन स्थानबाट सेवा सञ्चालन गर्दै ‘चेन अफ हस्पिटल’का रुपमा सुपर स्पेशियालिटी सेवा उपलब्ध गराउने तयारी भइरहेको अस्पतालले जानकारी दिएको हो ।

अस्पतालले २४ वर्ष पूरा गरी २५ औं वर्ष प्रवेशको अवसरमा विराटनगरमा आयोजना गरिएको पत्रकार सम्मेलनमा अपरेशनल डाइरेक्टर राजेश भट्टराईले सो जानकारी दिनुभयो । उहाँले विराटनगर स्वास्थ्य सेवाको क्षेत्रमा मेडिकल हब को रुपमा स्थापित भइसकेको बताउनुभयो ।

रजत जयन्ती वर्षको अवसरमा अस्पतालले सामाजिक उत्तरदायित्व स्वरुप तुलासादेवी फाउन्डेसनको स्थापना गरेको पनि जानकारी दिइएको छ । फाउन्डेसनमार्फत हरेक वर्ष कोशी प्रदेशका एक उत्कृष्ट नर्स र एक उत्कृष्ट मेडिकल अफिसरलाई ५१-५१ हजार रुपैयाँ राशीको पुरस्कार प्रदान गरिने अस्पतालले जनाएकाे छ।