इटहरी । जनता समाजवादी पार्टी (जसपा) नेपाल प्रदेश नं. १ को अधिवेशन आगामी भदौ २७ र २८ गते हुने भएको छ । आइतबार सम्पन्न जसपा प्रदेश नं. १ कार्यकारिणी बैठकले अधिवेशनको मिति र स्थान तय गरेको हो । अधिवेशन प्रदेश नं. १ को राजधानी विराटनगरमा भव्य रूपमा सम्पन्न हुने जसपाले जनाएको छ ।
अधिवेशनको तयारीलाई तीव्रता दिँदै विभिन्न जिम्मेवारी बाँडफाँड गरिएको जसपा प्रदेश नं. १ का अध्यक्ष दिपक याक्खाले जानकारी दिए । उनले भने, “अधिवेशनलाई भव्य र सभ्य ढंगले सम्पन्न गर्ने तयारी गरिरहेका छौँ । यसका लागि विभिन्न उपसमिति गठन गरेर काम अगाडि बढाएका छौँ । प्रदेश १ बाट महत्त्वपूर्ण राजनीतिक सन्देश दिनेगरी यस अधिवेशनलाई उपयोग गर्ने पार्टीको योजना छ ।”
अधिवेशनको बन्दशत्रमा जसपाका अध्यक्ष उपेन्द्र यादव, सह–अध्यक्ष तथा १ नं. प्रदेश आन्दोलन परिचालन समितिका संयोजक रकम चेम्जोङ लगायत शीर्ष नेताहरूले सम्बोधन गर्नेछन् । जसपा प्रदेश नं. १ का मुख्य सचिव घनश्याम कटुवालका अनुसार अधिवेशनमा एक हजारभन्दा बढी प्रतिनिधि र पर्यवेक्षकको सहभागिता रहनेछ । उनले भने, “राष्ट्रिय समिति, जिल्ला समिति, जनवर्गीय संगठन र संगठित सदस्य संख्या अनुसार प्रतिनिधि र पर्यवेक्षकको व्यवस्थापन हुनेछ । हामी सदस्यता संकलनको काम चाँडै सम्पन्न गर्ने तयारीमा छौँ ।”
बैठकले अधिवेशनको निर्वाचन कार्य सम्पन्न गर्न अधिवक्तासमेत रहेका उपेन्द्र लावतीलाई केन्द्रीय निर्वाचन आयोगमा सिफारिस गर्ने निर्णय पनि गरेको छ ।
अधिवेशनका लागि गठित उपसमितिहरूमा आर्थिक व्यवस्थापनका लागि केशव जबेगू, मनोज यादव, टंक मोक्तान, ऐत चेम्जोङ, रिता खापुङ र दीर्घमान तामाङलाई जिम्मेवारी दिइएको छ । प्रचार प्रसार तथा प्रकाशनको जिम्मेवारी हस्तशोभा राई, भक्त राई, नवीन माबोहाङ र श्याममाया राईलाई दिइएको छ ।
त्यस्तै, राजनीतिक प्रतिवेदन दिपक याक्खा, सांगठानिक प्रतिवेदन घनश्याम कटुवाल र आर्थिक प्रतिवेदन केशव जबेगूले प्रस्तुत गर्ने छन् । प्रतिनिधि व्यवस्थापनमा विष्णुकुमार लावती, विशाल आङ्देम्बे, तेन्जिङ शेर्पा, मनोज यादव, आङ्छेपाल शेर्पा र भरत याक्खालाई जिम्मा दिइएको छ ।
अतिथि सत्कारमा पदमकुमारी राई, उषा यादव र कुमार सुनुवारले भूमिका निर्वाह गर्नेछन् भने हल, मञ्च र आवास व्यवस्थापनमा अनिल ठाकुर, सम्सतबरेज आलम, नवीन राई र छिवाहाङ राई रहेका छन् ।
प्रदेश अधिवेशन तयारी अन्तर्गत लिम्बुवान राष्ट्रिय समिति, किरात राष्ट्रिय समिति, शेर्पालुङ राष्ट्रिय समिति र मधेश राष्ट्रिय समितिका साथै मोरङ, सुनसरी, धनकुटा, पाँचथर, संखुवासभा, भोजपुर, सोलुखुम्बु लगायतका जिल्लामा अधिवेशन सम्पन्न भइसकेको र बाँकी जिल्लामा चाँडै अधिवेशन सम्पन्न गरिने मुख्यसचिव कटुवालले बताउनुभयाे ।