विराटनगर ।गौर हत्याकाण्ड छानबिनका लागि सर्वोच्च अदालतले दिएको परमादेश पूर्वाग्राही रहेको भन्दै जनता समाजवादी पार्टी (जसपा) नेपालका नेता–कार्यकर्ताले विराटनगरमा विरोध प्रदर्शन गरेका छन्।
विराटनगरस्थित संसारी माई मन्दिरमा भेला भएर जसपा नेपालका कार्यकर्ताले विरोध प्रदर्शन गरेका हुन्। भूमि सम्बन्धी विधेयकमा जसपाले लिएको अडानका कारण अध्यक्ष उपेन्द्र यादवलाई तर्साउन शासक वर्गले गौर हत्याकाण्डलाई उचालिएको आरोप लगाउँदै उनीहरूले विरोध गरेका हुन्।
जनता समाजवादी पार्टी नेपाल मोरङले बुधबार विराटनगरको संसारी माइस्थानबाट निकालेको जुलुस नगर क्षेत्रको विभिन्न भागको परिक्रममा गर्दै बुधहाट चौक स्थित हनुमान मन्दिर अगाडि सडकमा विरोध सभा आयोजना गरेका थिए ।
जसपा मोरङका अध्यक्ष राजकुमार यादवको नेतृत्वमा प्रदर्शन भएको हो। अध्यक्ष यादवले गौर घटना राजनीतिक मुद्दा भएकाले राजनीतिक रूपमा समाधान हुनुपर्ने बताएका छन्। पूर्वाग्रहसहित छानबिन अघि बढाइएकाले विरोध गर्नुपरेको उनको भनाइ छ।
सो अवसरमा जसपा नेपालका केन्द्रीय सदस्य संजय सिंहले निरन्तर संघर्ष जारी रहने बताए। त्यस्तै, लोकतान्त्रिक समाजवादी पार्टी (लोसा पा) मोरङका अध्यक्ष मोहम्मद कादिरले समेत मन्तव्य राखेका थिए। विरोधसभामा विभिन्न तहका नेता तथा कार्यकर्ताको उल्लेख्य उपस्थिति थियो।