विराटनगरमा मंगलबार भएको दर्दनाक सडक दुर्घटनामा बाबु–छोरीको ज्यान गएको छ । विराटनगर–१४ सरस्वती चोक निवासी गिरीजानन्द ठाकुर र उनकी १४ वर्षीया छोरी गरिमा ठाकुरको घटनास्थलमै मृत्यु भएको प्रहरीले जनाएको छ।
बालिका गरिमा ठाकुर विराटनगर–१४ स्थित बाल माध्यमिक विद्यालयमा कक्षा ६ मा अध्ययनरत थिइन् । विद्यालयबाट छुट्टीपछि बाबु गिरीजानन्द ठाकुरले साइकलमा राखेर घर फर्काउँदै गर्दा जतुवा क्षेत्रमा ग्यास बुलेटले ठक्कर दिएको थियो । दुर्घटनामा बाबु–छोरी दुवैको घटनास्थलमै मृत्यु भएको हो ।
स्थानीयवासीले सडक निर्माण ठेकेदारको लापरबाहीका कारण दुर्घटना भएको आरोप लगाएका छन् ।
तीन महिनादेखि सडक खनेर चारैतर्फ घेराबेरा गरी बेवारिसे अवस्थामा छाडिएकाले दुर्घटना निम्तिएको उनीहरूको भनाइ छ ।

दुर्घटनामा संलग्न ग्यास बुलेट चालक रामलाल सहनी र सवारीसाधनलाई इलाका प्रहरी कार्यालय रानीले नियन्त्रणमा लिएको छ । घटनापछि आक्रोशित स्थानीयले आइसीपी मोड क्षेत्रमा सडक निर्माण कम्पनीका ठेकेदारलाई कारबाही गर्नुपर्ने माग गर्दै आन्दोलन सुरु गरेका छन् ।